琴日睇完江嘉敏背住男友Anthony，姣黐佢老友X先生，企圖氹新仔畀50萬開琴行，又同X先生夾計瞞住男友Anthony去日本偷食，女主角江嘉敏得悉偷食穿煲，貪相曝露後，即在ig出 post還擊X先生，既然江小姐咁大口氣，今日，我哋就一齊睇吓佢幾貪錢！
每杯罰款$500
話說江小姐同X先生識咗唔夠兩個月，女方表面好似好關心男方，知X先生成日去飲酒，就諗咗個絕世方案畀佢，希望對方可以健康啲咁話喎﹗呢個方法就係，若X先生每晚12點過後飲酒，就要每杯罰500蚊俾佢袋！OMG… 呢條呃錢橋係就係老土咗啲，不過，純純兔X先生又真係受喎！X先生以為江嘉敏口中講嘅飲酒罰款遊戲只係講吓笑，一直都冇認真計算，直到有一日，江嘉敏忽然同佢計數，X先生講笑話罰100蚊，佢竟然發老脾！江嘉敏先問X先生:「100蚊公平咩？」，仲話要獎罰分明，叫對方諗清楚罰幾多。為咗得手，貪婪嘅江嘉敏真係幾厚皮都做得出。
之後江嘉敏Keep住叫X先生自己報數，見對方冇反應，硬功未得逞，出軟功，撒晒嬌咁話：「而家落雨，今晚外景可能會取消，唉，仲諗住食個飯都得，不過有人就好曳，唔肯報數，咁就由佢！」江嘉敏突然話可以食餐飯，X先生梗係開心啦，即刻話食飯兼報數，而佢當刻冇諗過食飯背後嘅用意，其實係要佢交罰款，準備有錢落袋。
不斷提X先生㩒現金交罰款
唔使十分鐘，江嘉敏就list咗X先生喺6月9、14同16日裡面，過咗12點飲咗15.5杯，每杯500蚊咁計，總共要畀7750蚊罰款。江嘉敏仲溫馨提示X先生，提佢要帶cash交罰款，仲話不設找續添！見到個溫馨提示，X先生先回佢食完飯後㩒畀佢，之後俾佢催命符搞到好煩，貪錢本色逐現形，所以再回多個「Fuxk」畀佢。食飯見面前，江嘉敏又再提X先生，叫佢唔好借啲意唔㩒錢，如果唔係下次就會double up個罰款。嘩，唔好去搶﹗仲勸佢㩒定錢先好過去。
你精X先生都唔笨，keep住提佢要㩒錢，就係提得太多次，搞到X先生都有啲反感，最後索性唔畀江嘉敏口中所謂嘅罰款。
江嘉敏見事敗，一日未收到錢，又點會同X先生斬纜，佢軟硬兼施，硬追罰款失效，就借啲意用溫柔嘅聲線同X先生講國語，聽到江嘉敏句句嗲聲嗲氣，即時KO咗X先生，繼續做佢隻兵。